Somalilandpost | News and Analysis

Golaha Wasiirrada oo Dood iyo Falan Qayn Ka Yeeshay Miisaaniyadda 2018 oo todobaadka dambe la ansixinayo

Hargeysa (SLpost)- Golaha Wasiirrada Somaliland, ayaa shirkooda todobaadlaha ee maanta dood adag kaga yeeshay odoroska Miisaaniyadda Qaranka ee 2018-ka oo lagu wado in Goluhu ansixiyo todobaadka soo socda, sida lagu sheegay war-saxaafadeed ka soo baxay xafiiska Afhayeenka madaxweynaha.

IMG_4707War-saxaafadeedka oo nuqul ka mid ahi soo gaadhay xafiiska warbaahinta Somalilandpost.net, ayaa u qornaa sidan:- “Kal-fadhigii toddobaad (7aad) ee ay yeeshaan Golaha Wasiirrada Jamhuuriyadda Somaliland oo uu shir-gudoominayey Madaxweynaha Jamhuuriyada Somaliland, Mudane Muuse Biixi Cabdi kuna wehelinaayey Madaxweyne ku-xigeenka Somaliland, Mudane Cabdiraxmaan Cabdilaahi Ismaaciil (Saylici), ayaa maanta oo ay taariikhdu tahay 22.03.2018, shirkoodii Khamiislaha ahaa ku yeeshay xarunta Madaxtooyada.

Shirkaasina waxa lagu lafo guray miisaaniyad-sanadeedka 2018 oo ay soo gudbisay wasaaradda horumarinta Maaliyaddu iyadoo uu sharraxaad ka siiyey golaha, wasiirka wasaaradda horumarinta maaliyada, mudane Yuusuf Maxamed Cabdi, isagoo tilmaamay ahmiyadda ay leedahay  iyo sida ay ugu saleeyeen qorshaha labaad ee horumarinta qaranka.

IMG_4679Waxaanu goluhu ka yeeshay dood iyo falan qayn, isla markaana si qoto dheer uga dooday meelaha ay awoodda saarayso odoroska miisaaniyad sanadeedka 2018 ka, iyadoo dood dheer ka dib loo ballamay kal-fadhi danbe si loogu ansixiyo miisaaniyad sannadeedkaasi.

Ugu dambayn madaxweynaha Somaliland waxa uu xog-warran ka siiyey golaha wasiirrada guulaha ay Somaliland ka soo hoysay safarkii taariikhiga ahaa ee weftigii uu hoggaaminayey ku tageen Isu-tagga Imaaraadka Carabta, kaasoo salka ku hayey xidhiidhka wanaagsan ee labada dal iyo horumarka ganacsi ee ka dhexeeya, waxaanu safarkani ahaa mid indhaha beesha caalamka ku soo jeediyey Jamhuuriyadda Somaliland, isla markaana taabbo gelinaya horumar siyaasadeed iyo saaxiibo ganacsi oo hor leh.” Sidaas ayaa lagu sheegay war-saxaafadeedka.

Fikraddaada kaga Dhiibo FACEBOOK

RAADI WARARKII HORE